باقة من أشعار شفيق ديب

سافرْت من أسبوع وشْويّة
تارك أمانة .. بْمكتبي هْديّة
دوّرت عمر وبعد ما دوّرت
نقّيتها.. و كبْرِت بعينيّي

استقبلتها ..طفلة وحيدة وصرْت
إحكيلها كلْ شي انحكى عْليي
بالليل غنّتلي .. و بِ رغم الصّمت
جاري حلف .. ما شاف غنّيّة

والصبح ضحكتلي! إلي! وْ قرّرْت
نقضي العمر قهوة .. انا وهيّة
والعصر ضمّتني وأنا تكسّرْت
مليان عضمي نقص حنّيّة

وبْرغم من كل شي انكتب عالكرْت 
سافرت من اسبوع وشْوية
شو عْملْت .. والله بعرف تْأخّرْت
آسف .. مَ بستاهل ها لِهْديّة

عمرك لا تلعب في مشاعر بنْت
نامت ببيتك شهر يا خيّي
علّقتها في مكتبي وسافرْت
يا ريتني علّقتها فيّي

****** 

لا عاد تتركني .. يا دكّان التّحَف
يا ريت تمنحني شي غرفة مْن الغرف
غرفة .. بهالساعة .. اللي فيها طْيور سود
صاروا الطيور البيض .. نوع مْن الترف

هونيك خلّيني .. بْأمان مْن الوجود
ما في وجود يليق.. في شاعر عزَف
بالمنتصف ما بحبّ وقّف عالحدود
والمشكلة خير الحدود .. المنتصف

دخلك يا دكّان التحف.. يا بو القُدود
كل ما الصّباح انْهار والجّار انصرف
كل يوم .. خلّيها لهالأمّ الخدود
ترمي الي وردة .. من الفاز الخزف

عالرّف .. في فازة خزف .. عا شكل عود
بالورد محشيّة .. وحَواليها صَدف 
شو الفايدة بكرا .. اذا وصْلوا الجّنود
في ليل مالو ضو ... وانباعت نتف

بيجوز يبقى الورد عندك عالقيود
ويضيْع وجهو .. متل شي سرّ انكشف
بيع التّحف .. وتْروك بعْيوني الورود
ما بقبل تْعدّ الوُرود مْن التّحف

****** 

عالحيط بدلة عسكريّة بْبالها
ايّام ضابط جيش .. يا نيالها
وباكيت دخان وصور فارس عريق
عم يشهدوا حقبة... الأبد صلالها

ووراق وصلانة من الماضي الغريق
ونسور وسيوف ونُجوم وآلهة
وريحة تراب مشجّر وريحة حريق
عم يبردوا عا كمامها وعا شالها

اوعى تظنوا قماشها صفّى عتيق
او خيّم النسيان عا اطلالها

بتبقى فتيّة ورحمة تراب الفريق
الا الفهمها ما حدا بينالها

ولو تسألوني ليش عن حق وحقيق
جايي ل غنّي في وجود رجالها
لما حنيني الاول بيرجع يفيق
والذكريات يلبّسوني خيالها

بشوف الوطن والمرجعية والبريق
كل ما وقفت قبال عظمة حالها
وبشوف صورة من وهج جدّي شفيق
كل ما وقفت قبالكن وقبالها

August 2019
Su Mo Tu We Th Fr Sa
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

شارك برأيك

مارأيك بالهدنة؟
عدد الزيارات
7563423

Please publish modules in offcanvas position.